1 Corinthians 10
A'alosi'a ta Isilaeli Usu'ulingengi Xo loxo 'o Io Ngalapau no 'a Tovotovo
1 aTa vivilo, eni emasaxa lexe ngingi ngalavu laixe lexe tatei ne ta 'ilu'ilusunenge mixolu no laaxu sauma e maminge mulosi'a sou mupamuxane'i no 'a vote'i. La sou ane'i mimulinu sou mixisa'i sou luaki. 2La sou ane'i mi'ulo no 'a sauma xe no 'a luaki ne sou mixali ta mitemau Mosesi. 3 bXo ane'i mukalusi ne mi'ani no 'a la'ilali sou Uleenu iouvilesisi. 4 cMo miie no anu Uleenu iouvilesisi ne munixi loxo lexa no 'a lavo'o tatila mo anu a ilo'a imuamua'i ne. Lavo'o tatila ane ne anu Kalisito. 5 dIa Lataua u'osasou tavu'alo noxi'a ne 'ilixoi'a uasi. La sou misoisoli mole vasime'a mutautaolu no xalee lia vitanisi. 6 eIoxe la sou mii ane ne anu uxali loxo sosovo vile e sou nenge tamaisou la usu'ulinenge sou tapoloxalonu 'ilixo masumasua ane ane'i mi'oxonu. 7 fLa sou mamu sou ngingi ngalotu noxi'a ta lataua kalakalavoi loxo ane'i se'i noxi'a mi'oxonu. Xo mikaukavunu no 'a Lavuku Tavuna teinu aloxo 'o,“Ane'i ixolu sou i'ani xe iie ukalu la ane'i ilai sou imolovila'isi'a ta sema.”
8 gMo nenge kalumo mamu sou ta'oxonu 'ilixo sou vote'i loxo ane'i se'i mi'oxonu. Xo no voxo ane ne la ta mitema 23,000 misoisoli no voxo vilesisi sou susu noxi'a. 9 hXe mamu sou nenge tatovonu Tila loxo ane'i se'i noxi'a mi'oxonu xo ane'i mi'oxo aloxo ne la ta sinana veveeni mingangasi'a la misoisoli. 10 iLa sou ngingi ngavikala masua noxou Lataua loxo se'i noxi'a mi'oxonu mamu. Xo ane'i mi'oxonu aloxo ne la angelo sou uve'a ta mitema isoli mune'e muve'a misoisoli. 11Mii ane muxali noxi'a ne anu loxo sosovo la sou ane'i mikaukavunu muxolu mo sou nenge tamaisou la taumolu xo nenge taxolu no mine voxo kalukaluxusou. 12La sou ngingi ngexavutala lexe ngingi ngetulu peki'ainge la ngalaxa'i laixe xo loxo 'o io ngalapau. 13Tovotovo iouvilemo a muxali noxinge ne uasi ia iouvilesisi loxo uxaxali noxi'a ta mitema 'o si. Mo Lataua ne umulinu vaikalausi, la sou Anu umalanixu tovotovo ane umomomo sou ngingi ngauaulixu uasi ne uxali noxinge uasi. Ia no mine tovotovo uxalisinge la Anu kalumo ne upolonu vote'isinge la sou ngingi ngamomomo sou ngalapau uasi.
Lavilelu Noxou Lataua Kalakalavoi Xe 'Ani Noxou Tila
14Aloxo ne la sou ta menexilo emasaxainge, lexe nga'ume ngaxexee no anu 'ilixo sou lalotu noxi'a ta lataua kalakalavoi. 15Eni avikala ulai noxi'a ta mitema ane sou lavulavu, lexe ngingimenge ngailevinu mii ma'ia ane eni elemolu noxinge ne. 16 jPaku sou tavikala laixe musuku no anu ne upitanenge no nano no anu sialuxu Kalisito. Mo veleti ane nenge tase'ise'nu ne upitanenge no nano no anu vasimolu Kalisito. 17 kTava'u lexe veleti vilesi ne la sou nenge tavu'alo ne taxali vasimolu vilesisi. Xo nenge ukalusi ne tavaisuxu veleti vilesisi ne. 18 lXavutalamengi umuline'i ta mitema ne Isilaeli. Ane'i ane i'ou mii e mi'elaxu ne la loxovaa ipita no 'a valovalo noxou Lataua. 19 mLoxovaa vaikalaxeni ne laaxu lexe mii ane mi'elaxu mulai noxou lataua kalavoi ne anu mii vile manina mo lataua kalavoi ne anu mii vile manina? 20 nUasisi ane. Mii ane ta mitema ane'i ane ta Iutaia uasi i'elaxu ne ane'i i'elaxu ulai noxi'a ta uleenu masumasua ia ulai noxou Lataua uasi. Mo eni amasaxa sou ngingi ngapita noxi'a ta uleenu masumasua mamu. 21 oMo umomomo sou ngingi ngaie no 'a pakuxu Tila xe pakuxa'a ta uleenu masumasua kalumo uasi. Xe umomomo sou ngingi nga'ani no 'a valovalo sou 'ani noxou Tila xe no 'a valovalo sou 'ani noxi'a ta uleenu masumasua kalumo uasi. 22 pLoxovaa, nenge tatovo sou ta'oxonu Tila la'iaxu mo ulavinenge? Loxovaa, nenge peki'ainge muaulixu anu xaviinu?Ane'i Ane Imulaxu Tane'i ne Vasime'a Papaxesi
23 qLa sou mimii ta piena ne anu laixe sou nenge ta'oxonu ia anu mimii ta piena ne umomomo sou usu'ulinu xoluxolunenge uasi. Mo mimii ta piena ne anu laixe sou nenge ta'oxonu ia anu mimii tapiena ne umomomo sou u'oxo maulixa'a ta menexinge ne uleme pekia'u uasi. 24 rMo mamu sou nenge ta'oxo lexe tasu'ulinengesi uasi. Nenge tasu'uline'i ta menexinge kalumo. 25La sou mimii ane xiasinu e ta mitema itaolunu la ngano'u noxi'a mo nga'ousi. Ia mamu sou ngaxavutala piena no anu mo ngatali'isou. 26 sXo,“Lialia mo mimii ta piena e muxolu no anu 'o ne anu mii noxou Tilasi.”
27Mo ane'i leviani e ilavusou imulaxu tane'i uasi i'avalinge io ngamasaxa lexe ngalai xe nga'ani la nga'ou mii ma'ia ane mimulaxu no talangenge ne. Io ngaxavutala piena no anu mo ngatali'isou uasi. 28 tIa lexe vile uvikalangengi aloxo 'o,
“Mii ane ne milaixu sou mi'elaxu ulai noxi'a ta lataua kalakalvoi.”
La mamu sou ngingi nga'ou. Ngaxavutala laixe xo itema ne muvikalangengi io maasi xe ngingi nga'ou la ngingi ngasusu noxou itema ne. 29La sou ngaxavutala laixe noxou itema xavutalau. Ia ngingi ngaxavutala ngaangingi uasi. Ia tava'u loxovaa la sou xavutalau itema vile mo ne usakingengi mo ulevingengi ne? 30 uIa lexe eni a'ou mii ane eni evikala laixe musuku no anu. La sou loxovaa la itema vile mo ne uvikala masua noxilo no anu? Eni elavusou lexe eni evikala laixe musuku noxou Lataua mukalu la sou eni e'ou. 31 vLa sou mii ma'ia mukalusi ane ngingi nga'ou xe ngaiexu mo nga'oxonu ne sou ngaitinu Lataua ualasou no anu. 32 wMamu sou ngasusulixa'a se'i noxi'a ta Iutaia xe ta Xiliki xe lalotu noxou Lataua sou ilapau no anu. 33 xXo eni kalumo atovonu sou alosi'a ta mitema ukalusi 'osa'osa no 'a vote'i mose'i. Xo eni melo amomomo sou axalisou xeli xoluxolu laixe mo uasi. Xo xoluxolu laixe ne noxi'a ta mitema ukalusi sou ane'i ino'u mauli no anu.
Copyright information for
ATA